Foto: shutterstock
Joriy yilning 1 yanvaridan 12 noyabriga qadar Rossiya ilgari RFda sudlangan 295 nafar Qirgʻiziston fuqarosini jazo muddatini oʻz vatanida oʻtashni davom ettirishi uchun ushbu respublikaga yubordi. Markaziy Osiyo mamlakati Bosh prokuraturasi taqdim etgan shunday statistika haqida 24.kg xabar beradi.
Nazorat mahkamasining aniqlik kiritishicha, yana 65 nafar Qirgʻiziston fuqarosiga nisbatan topshirish tartib-taomili yakunlangan va hozirda mahkumlar vataniga etap qilinishini kutmoqda. Jarayonning sekin kechishi har bir holat Rossiya Federatsiyasi qonunchiligi, xalqaro shartnomalar va muayyan jinoyat ishi tafsilotlarini hisobga olgan holda alohida koʻrib chiqilishi bilan izohlanadi.
Shu bilan birga, 2026 yil boshidan buyon Rossiya sudlangan 52 nafar qirgʻizistonlikni uyiga qaytarishni rad etdi. Ulardan 21 nafari jinsiy daxlsizlik va shaxsning jinsiy erkinligiga qarshi jinoyatlar, yetti nafari terrorchilik xususiyatdagi qilmishlar, yana 24 nafari boshqa jinoyatlar, jumladan qotillik va odam oʻgʻirlash uchun jazoga hukm qilingan.
Bosh prokuratura jazoni oʻz mamlakatida oʻtash imkoniyati gumanitar ahamiyatga ega ekanini bildirdi: bu mahkumlarga oilasi bilan aloqani saqlab qolish va jamiyatga qaytishga tayyorgarlik koʻrish imkonini beradi.
Shu oʻrinda qayd etish joizki, Qirgʻiziston Rossiya Federatsiyasi rasmiylari bilan hamkorlikni mustahkamlash maqsadida yaqin vaqt ichida Rossiyada respublika Bosh prokuraturasining vakolatxonasini ochishni rejalashtirmoqda. Muassasa vatandoshlarning huquq va qonuniy manfaatlarini himoya qilish bilan shugʻullanadi, bunda ozodlikdan mahrum qilish joylaridagi fuqarolarga, xususan, jazoni oʻtash uchun uyga qaytishiga koʻmaklashishga alohida eʼtibor qaratadi.
Umuman olganda, Markaziy Osiyo davlati nazorat organi maʼlumotlariga koʻra, soʻnggi yillarda vataniga topshirilgan mahbuslar soni ortib bormoqda. Chunonchi, 2022 yilda Rossiya 66 nafar, 2023 yilda — 79, 2024 yilda — 128, oʻtgan yili esa 237 nafar mahkumni qaytargan.
Shu bilan birga, ayni paytda Rossiya qamoqxonalarida 1100 dan ortiq Qirgʻiziston fuqarosi jazo oʻtayotgani taʼkidlanmoqda.
Chet elliklarni Rossiyadan oʻz fuqaroligi boʻlgan davlatlarga etap qilish jarayonining dolzarbligi rossiyalik amaldorlar mahbuslarni armiyaga yollash boʻyicha faol kampaniya olib borayotgani bilan izohlanadi. Ukrainadagi urushda qatnashayotgan qurolli kuchlar safini toʻldirgani uchun mahbuslarga jinoiy javobgarlikdan ozod etish, sudlanganlikni olib tashlash va RF fuqaroligini soddalashtirilgan tartibda berish vaʼda qilinmoqda.
Joriy yilning oktyabr oyida Qirgʻiziston Tashqi ishlar vazirligi rahbari Rossiyadagi vatandoshlarni Ukraina bilan urushda qatnashishga majburlash faktlari borligini tan oldi. Bunday xavfga koʻpincha qonun bilan muammosi bor muhojirlar duchor boʻlayotgani aniqlashtirilgan edi.
