Rafael Urazbaxtin. «Qayrat» FK fotosurati
Olmaotaning «Qayrat» klubi bosh murabbiy Rafael Urazbaxtin jamoani tark etganini ma’lum qildi. Mutaxassis o‘z tashabbusi bilan iste’foga chiqish haqida ariza bergan va klub rahbariyati uning arizasini qanoatlantirgan. Bu haqda «Qayrat» matbuot xizmati xabar berdi.
Urazbaxtin jamoa ketma-ket uchinchi marta chempion bo‘lish imkoniyatini yo‘qotganidan so‘ng klubni tark etdi. 25 oktyabr kuni «Qayrat» safarda «Akto‘be» bilan 2:2 hisobida durang o‘ynadi. Premer-liga tugashiga bir tur qolganida, olmaotaliklar 64 ochko to‘pladi va endi 68 ochkoga ega «Ordabasi»ga yetib ololmadi.
Shu bilan birga, «Qayrat» uchun mavsum UYEFA Konferensiyalar ligasida davom etmoqda. Umumiy bosqichning ikki turidan keyin jamoa bir ochko to‘pladi: dastlab olmaotaliklar Latviyaning «Riga» klubi bilan 1:1 hisobida durang o‘ynadi, keyin esa o‘z maydonida Gretsiyaning «Panatinaikos» jamoasiga 1:5 hisobida yirik mag‘lubiyatga uchradi. «Qayrat» navbatdagi yevrokubok uchrashuvini 5 noyabr kuni safarda «Atalanta»ga qarshi o‘tkazadi.
Urazbaxtin 2024 yil sentyabr oyida «Qayrat»ning asosiy jamoasi bosh murabbiyi etib tayinlangan edi. Uning rahbarligidagi ilk mavsumning o‘zidayoq klub Qozog‘iston chempioni bo‘lgandi.
2025 yilda «Qayrat» chempionlik unvonini himoya qildi, mamlakat Superkubogini qo‘lga kiritdi va o‘z tarixida birinchi marta UYEFA Chempionlar ligasining umumiy bosqichiga yo‘l oldi.
Joriy mavsumda esa olmaotaliklar Konferensiyalar ligasining umumiy bosqichiga chiqdi va chempionat tugashiga bir tur qolganida kumush medallarni qo‘lga kiritishni kafolatladi.
«Qayrat» bosh murabbiyi vazifasini bajaruvchi etib avval «Qayrat-Jastar» jamoasini boshqargan Jora Arutyunyan tayinlandi. U jamoani chempionatning «Altay»ga qarshi so‘nggi uchrashuviga, keyin esa Konferensiyalar ligasidagi ishtirokini davom ettirishga tayyorlaydi.
