sputniknews.uz sayti fotosurati
O‘zbekiston hukumati huzuridagi Migratsiya agentligi 20 oktyabrdan boshlab fuqarolarni Rossiya, Yevropa va arab davlatlariga ishga yuborish bo‘yicha o‘z xizmatlari uchun nol tariflarni joriy etdi. Bu chora tashkiliy tanlov asosida ishga ketayotgan fuqarolarga taalluqli bo‘lib, 2026 yil 31 dekabrga qadar amal qiladi. Bu haqda agentlik xabar berdi.
Agentlik direktori Muxsinxo‘ja Abdurahmonovning buyrug‘ida aytilishicha, yuqorida ko‘rsatilgan davlatlarga borish istagida bo‘lgan o‘zbekistonliklar istisno tariqasida migratsiya xizmati ko‘rsatadigan xizmatlar, jumladan, xorijga ketishga tayyorgarlik, o‘qitish va chet elda ishlashga moslashish xarajatlarini to‘lashdan ozod qilinadi. Ayrim hollarda tegishli kelishuvlar mavjud bo‘lsa, xarajatlar ish beruvchi tomonidan qoplanishi mumkin.
Shu bilan birga, tashkiliy tanlov asosida boshqa davlatlarga ishga yuborishda qo‘llaniladigan tariflar ham sezilarli darajada pasaytirildi. Idora ta’kidlashicha, yangi tariflar faqat 20 oktyabrdan keyin tuzilgan shartnomalarga nisbatan amal qiladi.
Janubiy Koreyada ishlashni rejalashtirayotganlar uchun xizmatlar ancha arzonlashdi. Ilgari malakasiz ishchilar uchun mo‘ljallangan E-9 vizasi egalari 50 ta bazaviy hisoblash miqdori (BHM) — 22 million so‘m (1830 dollar) miqdorida to‘lov qilgan bo‘lsa, endi xizmatlar paketi 10 BHMni, ya’ni 4,4 million so‘mni (366 dollar) tashkil etadi.
Migratsiya agentligi aniqlik kiritishicha, E-7 vizasi bo‘yicha ketayotgan fuqarolar — muayyan kasb bo‘yicha ma’lumoti yoki ish tajribasiga ega mutaxassislar uchun ham yangi tarif 10 BHMdan oshmaydi.
Yaponiyada ishlashni rejalashtirayotgan fuqarolar ham xuddi shu miqdorda to‘lov qiladi. Biroq texnik, gumanitar va diplomatiya oliy ta’lim muassasalarini bitirganlar uchun tarif atigi 1 BHM, ya’ni 440 ming so‘mni (36,6 dollar) tashkil etadi.
20 oktyabrdan boshlab agentlikning quyidagi davlatlarga tashkiliy tanlov asosida ishga yuborish bo‘yicha yangi tariflari ham kuchga kirdi:
✅ Isroil va boshqa davlatlar — 10 BHM: 4,4 million so‘m (366 dollar);
✅ Turkiya — 3 BHM: 1,32 million so‘m (110 dollar);
✅ Gruziya — 2 BHM: 880 ming so‘m (73 dollar);
✅ MDH davlatlari (Rossiya va Belarusdan tashqari), shuningdek, Mongoliya — 1 BHM: 440 ming so‘m (36,6 dollar);
✅ Belarus — 0,1 BHM: 44 ming so‘m (3,6 dollar).
Agentlik ta’kidlashicha, mazkur tariflar faqat O‘zbekiston migratsiya xizmati ko‘rsatadigan xizmatlarga taalluqli. Viza rasmiylashtirish, aviachiptalar, tibbiy ko‘rik va boshqa xarajatlar mehnat shartnomasi shartlariga muvofiq alohida to‘lanadi.
Yangi tartib chet elda qonuniy ishlashni istagan fuqarolarning qo‘shimcha xarajatlarini kamaytirishga qaratilgan.
« Bizning asosiy maqsadimiz — xorijda qonuniy ishlash imkoniyatlarini yanada kengaytirish, fuqarolarimiz uchun xizmatlarni qulay, shaffof va moliyaviy jihatdan maqbul qilishdir», — deya ta’kidlaydi Migratsiya agentligi vakillari.
ℹ️ Joriy yilning avgust oyida e’lon qilingan statistik ma’lumotlarga ko‘ra, xorijda taxminan 1,4 million nafar o‘zbekistonlik mehnat qilmoqda. Ularning qariyb 60 foizi yoki 834 mingdan ortig‘i Rossiyada ishlamoqda. Yana 258 ming nafar o‘zbekistonlik Yevropa davlatlarida ishlaydi. Mehnat migrantlari orasida Qozog‘iston (taxminan 84,5 ming kishi), Turkiya (72 ming kishi) va Janubiy Koreya (qariyb 46,5 ming kishi) ham mashhur yo‘nalishlar hisoblanadi.
