«Al-Jazira» — «Arkadag» uchrashuvidan lavha. OFK fotosurati
Turkmanistonning «Arkadag» futbol klubi OFK Chempionlar ligasi-2 musobaqasining joriy mavsumida ilk bor mag‘lubiyatga uchradi. Guruh bosqichining ikkinchi turida Turkmaniston jamoasi Abu-Dabida BAAning «Al-Jazira» klubiga 1:2 hisobida yutqazdi.
Mezbonlar 55-daqiqada oldinga chiqib olishdi: Malkom penaltini aniq amalga oshirdi. 66-daqiqada «Arkadag» hisobni tenglashtirdi — Abdi Byashimov gol muallifi bo‘ldi. O‘yin durang bilan yakunlanadigandek ko‘ringan bir paytda, qo‘shib berilgan oltinchi daqiqada Nermin Muykich bosh bilan zarba berib, «Al-Jazira»ga g‘alaba keltirdi.
«B» guruhining parallel uchrashuvida Bahraynning «Al-Muharraq» klubi Eronning «Gol Gohar» jamoasini 2:0 hisobida mag‘lub etdi. Gollarni 48-daqiqada penaltini aniq amalga oshirgan Artur Rezende va qo‘shib berilgan vaqtda raqib darvozasini ishg‘ol qilgan Fakundo Tobares kiritdi.
Ikki turdan keyin «Al-Jazira» to‘rt ochko bilan guruh peshqadami bo‘lib turibdi. «Arkadag» va «Al-Muharraq» hisobida uchtadan ochko bor, «Gol Gohar» esa bir ochko to‘plagan.
«Arkadag» keyingi uchrashuvini 28 oktyabr kuni «Gol Gohar»ga qarshi o‘tkazadi. Uchrashuv Tojikistonning Hisor shahridagi Markaziy stadionda bo‘lib o‘tadi.
