O‘zbekiston terma jamoasi futbolchilari. O‘FA fotosurati
O‘zbekiston futbol terma jamoasi 1 oktyabr kuni Toshkentdagi «Paxtakor» stadionida o‘tkazilgan o‘rtoqlik uchrashuvida Suriya terma jamoasini 4:1 hisobida mag‘lub etdi. Bu italiyalik murabbiy Fabio Kannavaro boshchiligida milliy terma jamoaning ilk yirik g‘alabasi bo‘ldi.
28-daqiqada Sherzod Esanov hisobni ochdi. Tanaffus arafasida Akmal Mozgovoy mezbonlar ustunligini ikki karra oshirdi. Ikkinchi taym boshida Husayn Norchayev uchinchi golni urdi, 90-daqiqada esa dubl qayd etdi. Qo‘shib berilgan vaqtda Muhammad Hakimovning avtogoli ortidan suriyaliklar hisobdagi farqni qisqartirdi.
Suriya bilan uchrashuvga qadar Kannavaro boshchiligidagi O‘zbekiston terma jamoasi ikki to‘pdan ortiq farq bilan g‘alaba qozonmagan edi. 24 sentyabr kuni o‘zbekistonlik futbolchilar Eronni 3:1 hisobida mag‘lub etgan. Bundan oldin jamoa Quvayt va Misrni 2:0 hisobida, Gabonni esa 3:1 hisobida mag‘lub etgan edi.
Uchrashuvdan so‘ng Kannavaro jamoadan maqomi qanday bo‘lishidan qat’i nazar, barcha o‘yinlarga jiddiy munosabatda bo‘lishni talab qilishini aytdi.
«Biz uchun “o‘rtoqlik uchrashuvi” degan tushuncha mavjud emas. Har bir o‘yinga jiddiy yondashish kerak. Men futbolchilardan yuqori sur’at va yuqori intensivlikda o‘ynashni so‘radim. Hali ko‘p jihatlarni yaxshilashimiz kerak, ammo bugungi uchrashuvni yaxshi o‘yin va g‘alaba bilan yakunlaganimiz quvonarli. Qadam-baqadam yaxshi jamoa shakllantiryapmiz», — dedi Kannavaro.
O‘zbekiston terma jamoasi navbatdagi o‘rtoqlik uchrashuvini 6 oktyabr kuni safarda Janubiy Koreyaga qarshi o‘tkazadi.
Fabio Kannavaro O‘zbekiston terma jamoasi bosh murabbiyi lavozimini 2025 yil 6 oktyabrda egallagan va uning qo‘l ostida jamoa tarixda ilk bor jahon chempionatiga chiqqan Timur Kapadzening o‘rnini egallagan. Suriyaga qarshi o‘yinni hisobga olganda, italiyalik mutaxassis terma jamoa bosh murabbiyi sifatida 13 ta uchrashuv o‘tkazdi. O‘zbekiston asosiy vaqtda beshta g‘alabaga erishdi, ikki marta durang o‘ynadi va har ikki holatda ham penaltilar seriyasida g‘alaba qozondi, shuningdek, olti marta mag‘lub bo‘ldi.
