Narendra Modi va Shavkat Mirziyoyev. O‘zbekiston prezidenti matbuot xizmati fotosurati
O‘zbekiston va Hindiston 2030 yilga qadar tovar ayirboshlash hajmini to‘rt baravar oshirib, 5 milliard dollarga yetkazishni rejalashtirmoqda. Bu boradagi kelishuv mamlakat prezidenti Shavkat Mirziyoyevning 30 avgust kuni davlat tashrifi bilan Toshkentga kelgan Hindiston Bosh vaziri Narendra Modi bilan muzokaralari chog‘ida erishildi, deb xabar beradi president.uz.
Muzokaralarda ikki tomonlama munosabatlar har tomonlama strategik sheriklik darajasiga ko‘tarilgani ta’kidlandi. Uchrashuvning asosiy mavzusi iqtisodiyot bo‘ldi. Qayd etilishicha, 2025 yilda o‘zaro savdo hajmi 33 foizga o‘sib, 1,3 milliard dollarga yetgan. So‘nggi yillarda qo‘shma korxonalar soni yetti baravar ko‘paygan. Ayni paytda ikki mamlakat o‘rtasida haftasiga 14 ta to‘g‘ridan to‘g‘ri aviareys amalga oshirilmoqda.
Tomonlar energetika, elektrotexnika, metallurgiya, strategik minerallar, sog‘liqni saqlash, farmatsevtika, qishloq xo‘jaligi va zargarlik sanoati sohalarida hamkorlikni rivojlantirish istiqbollarini qayd etdilar.
Mirziyoyev Hindistonning raqamli texnologiyalar, dasturiy ta’minot va startaplar sohasidagi yutuqlarini yuqori baholab, ushbu mamlakatni «jahon maydonida yuqori obro‘ va ta’sirga ega bo‘lgan ishonchli va istiqbolli strategik hamkor» deb atadi.
Muzokaralar yakunida qator hujjatlar imzolandi, jumladan:
▪️ Hindiston va O‘zbekiston yetakchilarining qo‘shma bayonoti;
▪️ 2026–2030 yillarga mo‘ljallangan hukumatlar o‘rtasidagi madaniy almashinuvlar dasturi;
▪️ 2026–2028 yillarga mo‘ljallangan turizm sohasida hamkorlik dasturi;
▪️ Ayurveda va an’anaviy tibbiyotning boshqa yo‘nalishlarida hamkorlik to‘g‘risidagi o‘zaro anglashuv memorandumi;
▪️ Oliy ta’lim va ilmiy tadqiqotlar sohasida hamkorlik to‘g‘risida kelishuv;
▪️ Samarqand viloyati va Gujarat shtati o‘rtasida sheriklik munosabatlarini o‘rnatish to‘g‘risida kelishuv;
▪️ Fayoztepa va Qoratepa hududlarida arxeologik tadqiqotlar o‘tkazish to‘g‘risida bayonnoma va boshqa hujjatlar.
Muzokaralardan so‘ng O‘zbekiston prezidenti Hindiston Bosh vaziriga «Oliy Darajali Do‘stlik» ordenini topshirdi. Bu O‘zbekistonning xorijiy fuqarolar uchun mo‘ljallangan eng oliy davlat mukofotidir.
