Birlashgan Arab Amirliklarining Etihad Airways kompaniyasi O‘zbekiston bilan muntazam aviaqatnovlarni yo‘lga qo‘ydi. Dunyodagi eng yaxshi aviakompaniyalar qatoriga kiruvchi tashuvchining birinchi reysi 10 avgust kuni Toshkent aeroportida kutib olindi, deb xabar beradi Uzbekistan Airports kompaniyasi o‘zining Telegram-kanalida.
Abu-Dabi — Toshkent yo‘nalishi bo‘yicha parvoz qilgan Airbus A320 samolyoti mahalliy vaqt bilan soat 02:30 da O‘zbekiston poytaxtiga qo‘ndi. An’anaga ko‘ra, samolyot suv arkasi bilan kutib olingan, layner yo‘lovchilariga esa gullar va milliy shirinliklar tarqatilgan.
Etihad Airways kompaniyasining Markaziy Osiyo respublikasiga birinchi parvozi munosabati bilan muntazam aviareyslarni ishga tushirish marosimi bo‘lib o‘tdi. Tadbirda aviakompaniya, aeroport va BAAning Toshkentdagi elchixonasi vakillari ishtirok etdi.
Parvozlar har kuni amalga oshiriladi. Bu poytaxtlar o‘rtasida yo‘lovchilar uchun qulay aviaqatnovni ta’minlaydi.
Arab kompaniyasining saytida Toshkentdan Abu-Dabiga ekonom-klass toifadagi aviachiptalar bir tomonga o‘rtacha 300 yevrodan biroz qimmat turadi.
«Etihad Airways — dunyodagi yetakchi aviakompaniyalardan biri hisoblanadi. Toshkentda bunday hamkorning paydo bo‘lishi yo‘lovchilar uchun yangi imkoniyatlar ochadi va O‘zbekistonning xalqaro aviatsiya xaritasidagi mavqeini mustahkamlaydi. Abu-Dabi bilan har kunlik to‘g‘ridan to‘g‘ri aviaqatnov nafaqat ikki mamlakat o‘rtasidagi ishbilarmonlik va sayyohlik aloqalarini rivojlantirishga, balki yo‘lovchilarga mintaqaning eng yirik aviatsiya xablaridan biri orqali keyingi sayohatlarini qulay tashkil etish imkonini ham beradi», — deya ta’kidladi Uzbekistan Airports matbuot xizmati.
ℹ️ Etihad Airways — Birlashgan Arab Amirliklarining milliy aviakompaniyasi bo‘lib, 2003 yilda tashkil etilgan va Abu-Dabi xalqaro aeroportida joylashgan. Kompaniya keng aviayo‘nalishlar tarmog‘iga ega. Etihad muntazam ravishda xalqaro soha reytinglarida parvozlar xavfsizligi, servis sifati va yo‘lovchilarga xizmat ko‘rsatish darajasi bo‘yicha yuqori baholarni oladi. Bundan tashqari, aviakompaniya doimiy ravishda dunyodagi eng yaxshi aviakompaniyalar qatoriga kiradi va mustaqil Britaniya agentligi Skytrax tomonidan berilgan 4 yulduzli sifat sertifikatiga ega.
