Yaponiya — Qirg‘iziston uchrashuvidan lavha. Qirg‘iziston futbol ittifoqi fotosurati
Qirg‘izistonning olimpiya futbol terma jamoasi Yaponiya terma jamoasiga 0:7 hisobida yirik mag‘lubiyatga uchradi va Osiyo o‘yinlarining chorak finaliga chiqish imkoniyatidan mahrum bo‘ldi. Guruh bosqichining ikkinchi turi doirasidagi uchrashuv 20 sentyabr kuni Yaponiyaning Ayti prefekturasidagi «Toyota» stadionida bo‘lib o‘tdi.
Birinchi bo‘limda yaponlar uchta gol urdi. 28-daqiqada Yumeki Yokoyama hisobni ochdi, keyin Shuto Nagano va jamoa sardori Yuto Ozekidan gollar bo‘ldi. Tanaffusdan so‘ng Yaponiya terma jamoasi yana to‘rt marta gol urdi — Yotaro Nakadzima penaltini aniq amalga oshirdi, Xisatsugu Isii va Yuday Simamoto bittadan gol urdi. Simamoto o‘z hisobiga dubl yozdi.
Qirg‘iziston uchun ushbu mag‘lubiyat turnirdagi ketma-ket ikkinchi mag‘lubiyat bo‘ldi. Birinchi turda Nadir Mamadaliyev shogirdlari Tailand terma jamoasiga 2:3 hisobida imkoniyatni boy bergandi. Holbuki, ikkinchi bo‘lim boshlanishiga qadar Qirg‘iziston 2:0 hisobida oldinda borayotgan edi. Qirg‘izistonliklar safida Kuduret Iskandarbekov va Aytenir Balbakov gol urdi.
Ikkinchi turning yana bir uchrashuvida Tailand Gonkongni 5:1 hisobida yirik hisobda mag‘lub etdi. Ikki turdan so‘ng Yaponiya va Tailand 6 ochkodan jamg‘arib, chorak finalga chiqishni muddatidan oldin kafolatladi. Qirg‘iziston va Gonkongda esa ochko yo‘q.
23 sentyabr kuni bo‘lib o‘tadigan hal qiluvchi turda Qirg‘iziston terma jamoasi Gonkong bilan o‘ynaydi. Uchrashuv natijasi pley-off yo‘llanmalarining taqsimotiga endi ta’sir ko‘rsatmaydi.
Osiyo o‘yinlarining erkaklar futbol turnirida 15 ta terma jamoa ishtirok etmoqda. Ular to‘rtta guruhga bo‘lingan bo‘lib, har bir guruhdan eng yaxshi natija qayd etgan ikki jamoa to‘g‘ridan to‘g‘ri chorak finalga chiqadi. Qirg‘iziston uchun bu galgi Osiyo o‘yinlari oltinchisi bo‘ldi. 2023 yilda Xanchjouda o‘tkazilgan avvalgi Osiyo o‘yinlarida jamoa 1/8 finalga qadar yetib borgandi.
Umuman, Osiyo o‘yinlarida Qirg‘iziston nomidan 30 ta sport turi bo‘yicha 168 nafar sportchi ishtirok etmoqda. 21 sentyabr holatiga ko‘ra, terma jamoa MMA bo‘yicha ikkita bronza medalini qo‘lga kiritdi — ularning egalari Dastan Qanibek uulu va Siymik Janibek uulu bo‘ldi. Yana bir qirg‘izistonlik sportchi Iriskeldi Duysheyev finalga chiqdi va kamida kumush medalni kafolatladi.
