AQSH Davlat kotibi Marko Rubio Samarqandda C5+1 formatidagi vazirlar uchrashuvida ishtirok etish uchun O‘zbekistonga keladi. Bu haqda AQSH Davlat departamenti xabar berdi. Safar 17–22 oktyabr kunlari bo‘lib o‘tadi. O‘zbekistondan so‘ng Davlat kotibi Hindistonga yo‘l oladi va u yerda Mumbay hamda Jamnagar shaharlarida bo‘ladi.
Davlat departamenti ma’lumotlariga ko‘ra, Samarqandda Rubio C5+1 formatidagi strategik hamkorlik AQSH va Markaziy Osiyo mamlakatlari uchun «yanada tinch va farovon kelajak» barpo etishga qanday yordam berayotgani haqida gapiradi. Bundan tashqari, u mintaqadagi barcha besh davlat — O‘zbekiston, Qozog‘iston, Tojikiston, Turkmaniston va Qirg‘izistonning yuqori martabali vakillari bilan ikki tomonlama uchrashuvlar o‘tkazadi.
Vazirlik ushbu safarni «tarixiy» deb atadi va Davlat kotibi 200 dan ortiq Amerika kompaniyalari rahbarlaridan iborat tijorat delegatsiyasiga boshchilik qilishini ma’lum qildi. Diplomatlarning ta’kidlashicha, mazkur tashrif AQSH va Markaziy Osiyo o‘rtasidagi ishbilarmonlik hamkorligida «yangi davr»ni boshlab berishi kerak.
Sentyabr oyi oxirida AQSHning Janubiy va Markaziy Osiyo bo‘yicha maxsus vakili Serdjio Gor bo‘lajak tashrif haqida ma’lum qilgan edi. O‘shanda gap 100 dan ortiq kompaniya vakillaridan iborat delegatsiya haqida borayotgandi, deb yozgan «Farg‘ona» agentligi. Muzokaralarning asosiy mavzulari sifatida mintaqaning iqtisodiy o‘zaro bog‘liqligini mustahkamlash, energetik xavfsizlik va umumiy mintaqaviy muammolarni hal etish belgilangan edi. Muhim minerallar va nodir yer metallari sohasidagi hamkorlik Vashington va Toshkent uchun alohida ahamiyatga ega. 2026 yil fevral oyida O‘zbekiston Tashqi ishlar vaziri Baxtiyor Saidov Vashingtonda Rubio bilan uchrashgan edi. O‘shanda tomonlar bunday resurslarni qazib olish va qayta ishlash sohasida hamkorlik qilish to‘g‘risida memorandum imzolagan.
Aprel oyida Vashingtonda Amerika-O‘zbekiston biznes va investitsiyalar kengashi o‘z faoliyatini boshladi. Uni tashkil etish to‘g‘risida prezidentlar Shavkat Mirziyoyev va Donald Tramp 2025 yil noyabr oyida bo‘lib o‘tgan C5+1 sammitida kelishib olgandi.
Rubio Davlat kotibi lavozimida O‘zbekistonga va umuman Markaziy Osiyoga birinchi marta tashrif buyuradi. Avvalroq u 2026 yilda mintaqadagi beshta davlatning barchasiga borish niyati borligini bildirgan edi. Biroq, hozircha faqat O‘zbekistonga tashrifi e’lon qilindi.
Hindistonda Rubio ikki mamlakat o‘rtasidagi strategik sheriklikni mustahkamlash va energetika sohasidagi hamkorlikni kengaytirish masalalari bo‘yicha rasmiylar bilan muzokaralar o‘tkazadi. Shuningdek, u ishbilarmon doiralar vakillari bilan uchrashadi. Bu uning joriy yilda Hindistonga ikkinchi rasmiy tashrifi bo‘ladi.
