G‘ofurjon Mirzayev. nso.ru syti fotosurati
O‘zbekiston prezidenti Shavkat Mirziyoyev Gafurjon Mirzayevni Bosh vazir o‘rinbosari — O‘zbekiston Mahallalari uyushmasi raisi etib tayinladi. Bu haqda davlat rahbari matbuot kotibi Sherzod Asadov xabar berdi.
Avvalroq Mirzayevning nomzodi O‘zbekiston parlamenti quyi palatasi — Oliy Majlis Qonunchilik palatasi deputatlari tomonidan ma’qullangan edi.
Gafurjon Mirzayev 1964 yil 21 aprel kuni Farg‘ona viloyatida tug‘ilgan. 1990 yilda Toshkent politexnika institutini, 2000 yilda esa Toshkent davlat iqtisodiyot universitetini tamomlagan. Turli yillarda Bag‘dod tumani hokimi o‘rinbosari, «O‘zdonmahsulot» korxonasi boshqarmasi boshlig‘i, Farg‘ona don ishlab chiqaruvchilari aksiyadorlik jamiyati raisi lavozimlarida ishlagan.
2003 yildan O‘zbekiston prezidenti Administratsiyasida inspektor bo‘lib ishlagan. 2016 yil 15 dekabrdan Mirzayev Sirdaryo viloyati hokimi lavozimida faoliyat yuritgan. 2020 yilda Oliy Majlis Senati IV chaqiriq senatori etib saylangan. 2023 yil avgustidan to shu kunga qadar prezidentning kadrlar masalalari bo‘yicha maslahatchisi lavozimida ishlab kelgan.
O‘zbekiston Mahallalari uyushmasi prezidentning 2023 yil 21 dekabrdagi farmoni bilan tashkil etilgan. Uyushmaning asosiy vazifalari — mahallani jamoat boshqaruvi va nazoratining tayanch bo‘g‘iniga aylantirish, aholining boshqaruvda faol ishtirokini ta’minlash, mahallalar muammolarini hal etishda davlat organlari sa’y-harakatlarini muvofiqlashtirish, shuningdek, budjet mablag‘larini ehtiyojmand oilalarga manzilli yo‘naltirishdan iborat.
2024 yil yanvaridan Uyushmaga Qahramon Quronboyev rahbarlik qilib kelgan edi. Uning iste’foga chiqishi sabablari ma’lum qilinmagan.
Gafurjon Mirzayev O‘zbekiston Vazirlar Mahkamasidagi beshinchi Bosh vazir o‘rinbosari bo‘ldi. Ayni paytda hukumat rahbari o‘rinbosarlari lavozimida Achilbay Ramatov, Jamshid Qo‘chqorov (shuningdek, Iqtisodiyot va moliya vaziri), Jamshid Xodjayev hamda Dilnozaxon Kattaxonova (Oila va xotin-qizlar ishlari qo‘mitasi raisi) faoliyat yuritmoqda.
