2026 yil birinchi yarmi yakunlariga ko‘ra, O‘zbekistonning davlat qarzi 48,3 milliard dollarga yetdi. Bu haqda Uznews.uz O‘zbekiston Iqtisodiyot va moliya vazirligi ma’lumotlariga tayanib xabar berdi.
Umumiy davlat qarzining 40,7 milliard dollari tashqi qarz, 7,6 milliard dollari esa ichki qarz hisobiga to‘g‘ri keladi. Davlat qarzining YAIMga nisbati 27 foizni tashkil etmoqda.
Tashqi qarzning asosiy qismi xorijiy valyutada ifodalangan — 80 foiz yoki 38,63 milliard dollar. Milliy valyutaning tashqi qarz tarkibidagi ulushi esa atigi 4 foizni (2,07 milliard dollar) tashkil etadi.
O‘zbekistonning eng yirik kreditorlari qatorida xalqaro moliya institutlari qolmoqda. Ularga 22,5 milliard dollar yoki davlat tashqi qarzining 55 foizi to‘g‘ri keladi.
O‘zbekistonning eng katta qarzi Jahon bankidan — 9,1 milliard dollar. Keyingi o‘rinda Osiyo taraqqiyot banki — 8,2 milliard dollar.
O‘zbekiston, shuningdek, Osiyo infratuzilmaviy investitsiyalar bankidan 2,3 milliard dollar qarzdor. Eksport-import davlat banki va Xitoyning boshqa tashkilotlari oldidagi qarzdorlik 3,8 milliard dollarga teng. Yaponiya xalqaro hamkorlik agentligi va Yaponiyaning boshqa tashkilotlaridan esa respublika 3,1 milliard dollar qarz olgan.
Tashqi davlat qarzining aynan yarmi — 20,5 milliard dollar — davlat budjeti taqchilligini qoplashga yo‘naltirilgan.
Qolgan mablag‘lar iqtisodiyot tarmoqlari bo‘yicha taqsimlangan. Yoqilg‘i-energetika sohasiga 5,5 milliard dollar yo‘naltirilgan. Sog‘liqni saqlash, ta’lim va axborot-kommunikatsiya texnologiyalariga 3,7 milliard dollar ajratilgan. Yana 3,4 milliard dollar uy-joy kommunal xo‘jaligiga, 3,3 milliard dollar qishloq va suv xo‘jaligiga, 3 milliard dollar transport infratuzilmasiga yo‘naltirilgan.
Tadbirkorlik faoliyati va sanoat ishlab chiqarishini qo‘llab-quvvatlashga 624 million dollar, kimyo sanoatiga esa 605 million dollar ajratilgan.
Qayd etish joiz, 2026 yil 1 yanvar holatiga O‘zbekistonning davlat tashqi qarzi 40,5 milliard dollarni tashkil etgan edi.
Xalqaro valyuta jamg‘armasi va xalqaro reyting agentliklari baholariga ko‘ra, O‘zbekistonning tashqi qarz yuki mo‘tadil darajada qolmoqda.
