O‘zbekiston prezidenti matbuot xizmati fotosurati
O‘zbekiston Prezidenti Shavkat Mirziyoyev va Germaniya Federal Prezidenti Frank-Valter Shtaynmayer Toshkent shahrida Volkswagen avtomobillarini yirik uzelli yig‘ish zavodini ishga tushirdi. Bu haqda O‘zbekiston rahbari matbuot xizmati xabar berdi.
Avtomobil zavodidan tashqari, Andijon viloyatida logistika markazi qurilishi, suyuq maishiy yuvish vositalari ishlab chiqarish, temir yo‘l sohasi uchun mutaxassislar tayyorlash hamda zamonaviy imtihon markazlarini ochish bo‘yicha loyihalar ham ishga tushirildi.
Loyihalar ikki mamlakat rasmiy delegatsiyalari ishtirokida tor va kengaytirilgan tarkibda o‘tgan oliy darajadagi muzokaralar doirasida ishga tushirildi. Tomonlar O‘zbekiston–Germaniya hamkorligini yanada rivojlantirish, siyosiy muloqotni mustahkamlash va savdo-iqtisodiy aloqalarni kengaytirishga oid muhim masalalarni muhokama qildi. Shavkat Mirziyoyev Frank-Valter Shtaynmayerning Yevropa Ittifoqi bilan O‘zbekiston va Markaziy Osiyo davlatlari o‘rtasidagi munosabatlarni rivojlantirishga qo‘shgan shaxsiy hissasini alohida ta’kidladi.
Muzokaralarning asosiy mavzusi savdo va investitsiya sohasidagi hamkorlik bo‘ldi. O‘tgan yil yakunlariga ko‘ra, o‘zaro savdo hajmi 1,4 milliard dollardan oshdi, joriy yil boshidan buyon esa yana 5 foizga o‘sdi. Germaniyaning O‘zbekiston iqtisodiyotiga kiritgan investitsiyalari hajmi 2025 yilda 2 milliard dollarga yetdi. May oyida Toshkentda o‘tkazilgan Germaniya iqtisodiyoti kunlari hamda Germaniya–O‘zbekiston ishbilarmonlar kengashining 10-yig‘ilishi yakunlari bo‘yicha umumiy qiymati 1 milliard dollardan ortiq bo‘lgan investitsiya va savdo bitimlari paketi imzolandi.
Prezidentlar sanoat, energetika va «yashil» iqtisodiyot, transport va logistika, konchilik va to‘qimachilik sanoati, farmatsevtika, qishloq xo‘jaligi, ta’lim hamda sog‘liqni saqlash sohalarida hamkorlikni yanada kengaytirish rejalarini tasdiqladilar.
Muzokaralar yakunlari bo‘yicha Shavkat Mirziyoyev va Frank-Valter Shtaynmayer qo‘shma bayonot qabul qildi. Shuningdek, O‘zbekistonda barqaror shahar rivojlanishi loyihalarini amalga oshirish uchun grant mablag‘lari va imtiyozli moliyalashtirish to‘g‘risidagi bitimlar imzolandi. Shundan so‘ng ikki mamlakat prezidentlari Ko‘ksaroy qarorgohidagi Faxriy mehmonlar xiyobonida daraxt ekishdi.
O‘zbekistonga rasmiy tashrifining ikkinchi kuni — 18 iyun kuni Germaniya Federal Prezidenti Frank-Valter Shtaynmayer Islom sivilizatsiyasi markazi va Günter Papenburgga tashrif buyuradi. Shuningdek, u malakali kadrlar migratsiyasiga bag‘ishlangan tadbirda ishtirok etadi. Ushbu tadbir doirasida stajorlar, Germaniya kompaniyalari vakillari hamda instruktorlar bilan uchrashuv o‘tkazishi rejalashtirilgan.
ℹ️ Volkswagen va «Uzavtosanoat»ning Alyans Auto qo‘shma korxonasi o‘rtasida O‘zbekistonda yirik uzelli yig‘ishni (SKD) yo‘lga qo‘yish bo‘yicha kelishuv IV Toshkent xalqaro investitsiya forumi doirasida imzolandi. Yig‘ish jarayoni Xitoydan keltiriladigan yetkazib berishlar asosida amalga oshiriladi, logistik yaqinlik esa bozorga samarali xizmat ko‘rsatish hamda uglerod izini kamaytirish imkonini beradi. «O‘zavtosanoat» boshqaruv raisi Ulug‘bek Ro‘ziqulov ma’lum qilishicha, nemis brendining bir vaqtning o‘zida yettita modeli ishlab chiqarilishi yo‘lga qo‘yiladi. Avtomobillar faqat O‘zbekiston ichki bozoriga emas, balki MDH davlatlari, Markaziy Osiyo va Kavkaz mamlakatlariga ham yetkazib beriladi.
Ilgari ham Volkswagen O‘zbekiston bozorida faoliyat yuritgan. 2020 yilda «Uzavtosanoat» va Volkswagen Group Rus Jizzax avtozavodi negizida Volkswagen Caddy modelini ishlab chiqarish bo‘yicha kelishuv imzolagan. O‘sha yilning yozida Volkswagen avtomobillarining sotuvi boshlangan, kuzda esa konsern tarkibiga kiruvchi Škoda mashinalari ham bozorga chiqirilgandi. Biroq 2023 yilda Volkswagen Group Rossiyadagi o‘z biznesini “Avilon” avtodileriga sotgan.
