Oʻzbekistonlik amaldorlar ogʻir xasta bolalarga yordam koʻrsatishga oid qonun loyihasini bir yilga kechiktirdi

Surat: AiF

Oʻzbekistonda ogʻir xasta bolalarga palliativ va xospis yordami koʻrsatishga doir qonun loyihasini parlamentga kiritish bir yildan beri paysalga solinmoqda. Oliy Majlis Qonunchilik palatasi deputati Sayyora Jumayeva Sogʻliqni saqlash vazirligidan kechikish sabablarini izohlashni hamda hujjatni qabul qilish muddatlarini maʼlum qilishni talab etdi, deb xabar beradi Kun.uz.

Jumayeva 2025-yil may oyidayoq prezidentning 186-sonli qarori bilan hukumatga «Fuqarolar sogʻligʻini saqlash toʻgʻrisida»gi qonunga palliativ va xospis yordamining huquqiy hamda tashkiliy asoslarini belgilab beruvchi oʻzgartishlar tayyorlash topshirilganini eslatdi. Hujjatni ishlab chiqish oʻsha yilning noyabr oyiga rejalashtirilgan edi, biroq oradan 12 oy oʻtgan boʻlsa-da, u deputatlar muhokamasiga taqdim etilmadi.

«Bu bolalar uchun har bir kun qadrlidir», — deya taʼkidladi Jumayeva ogʻir xasta bolalarning azoblarini yengillashtirish va ularning oilalarini qoʻllab-quvvatlash haqida soʻz borayotganini qayd etib.

Sogʻliqni saqlash vaziri Eldor Odilov kechikishni hujjatni qayta ishlash zarurligi bilan izohladi. Uning soʻzlariga koʻra, dastlabki qonun loyihasi tayyorlanib, hukumatga yuborilgan, biroq 2026-yil iyun oyida prezidentning yangi qarori qabul qilingach, davlat rahbari administratsiyasi uni qayta ishlash uchun qaytargan. Hozirda yangilangan hujjat yana Vazirlar Mahkamasida koʻrib chiqilmoqda. Vazir uning yaqin kunlarda parlamentga kiritilishiga umid bildirdi, ammo aniq sanani aytmadi.

Palliativ yordam hayot uchun xavf tugʻdiruvchi kasalliklarga chalingan insonlarda ogʻriq va boshqa ogʻir simptomlarni yengillashtirishga moʻljallangan. U tibbiy parvarish, bemorlar hamda ularning yaqinlariga psixologik va ijtimoiy madad koʻrsatishni oʻz ichiga oladi. Bunday yordam nafaqat ixtisoslashtirilgan muassasalarda, balki uy sharoitida ham, shu jumladan asosiy kasallikni davolash bilan bir vaqtda koʻrsatilishi mumkin.

Shu bilan birga, Oʻzbekistonda palliativ yordamni kengaytirish dasturi amal qilmoqda. Prezidentning 2026-yil 24-iyundagi qaroriga muvofiq, mamlakatda sayyor tibbiy brigadalar tashkil etish, yotib qolgan bemorlarni maxsus karavot va matraslar bilan taʼminlash hamda xospislar tarmogʻini rivojlantirish koʻzda tutilgan. Samarqand viloyatida 20 oʻrinli bolalar xospis markazi ochilishi belgilangan. Qashqadaryo, Fargʻona, Xorazm va Buxoro viloyatlarida esa umumiy sigʻimi 180 oʻrinli yana toʻrtta muassasa tashkil etilishi rejalashtirilgan. 2030-yilga borib hukumat ehtiyojmandlarning kamida 80 foizini palliativ xizmatlar bilan taʼminlamoqchi.

Oʻzbekistondagi ilk «Taskin» bolalar xospisi 2022-yilning avgust oyidayoq ish boshlagan edi. 20 oʻrinli mazkur muassasa Toshkent viloyatining Zangiota tumanida Ezgu Amal xayriya fondi tashabbusi bilan, Sogʻliqni saqlash vazirligi, Isroil elchixonasi hamda Isroilning «Shiba» tibbiyot markazi koʻmagida tashkil etilgan. Oʻshanda «Fargʻona» xabar berganidek, tashkilotchilar ochilish chogʻidayoq doimiy moliyalashtirish, xususan, bemorlarning ovqatlanishi va xodimlar mehnatiga haq toʻlash masalalarida tanqislik borligini bildirgan edi.

2024-yil fevral oyida Jahon sogʻliqni saqlash tashkiloti xospis xizmatlari onkologik kasalliklarga chalingan bolalarga bepul koʻrsatilayotganini, ammo Oʻzbekistondagi palliativ yordam tizimi yanada rivojlanishga muhtojligini qayd etgan edi. JSST asosiy muammolar qatorida kuchli taʼsir qiluvchi ogʻriq qoldiruvchi preparatlarning cheklangani, tibbiyot mutaxassislarini tayyorlash va ogʻir xasta bolalarga yordam koʻlamini kengaytirish zarurligini sanab oʻtgandi.