Maksim Shatskix. Foto: «Aziya» FK
Qirgʻizistonning «Aziya» klubi sobiq bosh murabbiyi, oʻzbekistonlik mutaxassis Maksim Shatskix davom etayotgan urushga qaramay, faoliyatini Ukrainada davom ettirishga tayyorligini maʼlum qildi. U «Ukrainskiy futbol» nashriga bergan intervyusida 12 noyabr kuni eʼlon qilingan Talas klubi bilan xayrlashuvdan keyingi rejalari haqida gapirib berdi.
Urush sharoitida Ukrainaga qaytish ehtimoli haqidagi savolga javob berar ekan, Shatskix shunday dedi: «Hech narsadan qoʻrqmayman. Axir oilam oʻsha yerda. Rafiqam ham, qizlarim, kuyovim va nabiram ham. Aniq taklif boʻlishi bilan chipta olaman-u, Ukrainaga uchaman».
Shatskixning kuyovi — Kiyevning «Dinamo» klubi yarim himoyachisi Nikolay Shaparenko. Oʻzbekiston milliy terma jamoasining sobiq hujumchisining oʻzi Kiyev klubida oʻn yil toʻp surib, olti karra Ukraina chempioni boʻlgan, futbolchilik faoliyatini yakunlagach esa «Dinamo» murabbiylar shtabida ishlagan.
Shatskix Kiyev klubiga qaytish ehtimolini inkor etmadi, biroq Ukraina Premyer-ligasining boshqa ishtirokchilaridan tushadigan takliflarni ham koʻrib chiqishga tayyorligini taʼkidladi. Mutaxassis uzoq tanaffus olish niyatida emas va Yevropa chempionatlarida mavsumning kuzgi qismi yakunlangach, keyingi ish joyini aniqlab olishga umid qilmoqda.
«Aziya»dan ketishi haqida gapirar ekan, murabbiy bu qaror u uchun kutilmagan boʻlmaganini qayd etdi. Uning soʻzlariga koʻra, rahbariyat klubning rivojlanish yoʻnalishini oʻzgartirmoqchi. Tomonlar hech qanday nizosiz xayrlashdi.
Shatskix, shuningdek, Qirgʻizistonda duch kelgan qiyinchiliklari haqida ham soʻzlab berdi. Respublika sobiq Bosh vaziri Omurbek Babanov tomonidan tashkil etilgan jamoani deyarli noldan, oʻz mashgʻulot bazasisiz shakllantirishga toʻgʻri kelgan. Yangi stadion faqat mavsum oxiriga kelib paydo boʻlgan, mashgʻulot maydonlari esa klubga doimiy ravishda taqdim etilmagan.
Shatskix boshchiligida «Aziya» Qirgʻiziston chempionatida 30 ta oʻyinda 61 ochko jamgʻarib, toʻrtinchi oʻrinni egalladi. Jamoaga bronza medallari uchun atigi bir ochko yetmadi.
Oktyabr oyida Eurasia Football sayti oʻz manbalariga tayangan holda Kiyevning «Dinamo» klubi Shatskix nomzodini 2027 yilda bosh murabbiylik lavozimiga koʻrib chiqayotgani haqida xabar bergan edi. Biroq hozircha tomonlar oʻrtasidagi muzokaralar rasman tasdiqlanmagan.
