«Shaxtyor» FK, «Shaxtyor» FK fotosurati
22 oktyabr kuni Qozog‘istonning Qarag‘anda shahrining «Shaxtyor» futbol klubiga Qozog‘iston Birinchi ligasidagi g‘alabasi uchun kubok va oltin medallar topshirildi. Kelasi mavsumda mamlakatning eng ko‘p sovrin qo‘lga kiritgan klublaridan biri yana Premer-ligada (QPL) ishtirok etadi.
Taqdirlash marosimi 22 oktyabr kuni mavsumning so‘nggi uchrashuvi — «Qayrat-Jastar»ga qarshi o‘yindan keyin bo‘lib o‘tdi. Qarag‘andaliklar o‘z maydonida 2:3 hisobida mag‘lub bo‘lishdi, ammo 65 ochko to‘plab, chempionatni birinchi o‘rinda yakunlashdi. 63 ochko bilan «Qayrat-Jastar» ikkinchi o‘rinni egalladi. Biroq, u farm-klub bo‘lgani sababli Premer-ligada ishtirok eta olmaydi. QPLga yo‘llanma olgan yana bir jamoa — Turkistonning «Turan» klubi bo‘ldi.
Birinchi liganing eng yaxshi to‘purari «Shaxtyor» hujumchisi Artyom Litosh bo‘ldi. U raqiblar darvozasiga 24 ta gol urdi. Futbolchi ilk bor Qozog‘iston milliy terma jamoasiga chaqiruv oldi.
«Shaxtyor» ikki mavsumlik tanaffusdan so‘ng oliy divizionga qaytmoqda. 2024 yilda qarag‘andaliklar QPLda oxirgi, 13-o‘rinni egallab, mustaqil Qozog‘iston chempionati tashkil etilganidan beri ilk bor elitadan tushib ketishgandi. Unga qadar klub 1992 yildan boshlab oliy divizionda uzluksiz ishtirok etib kelgan. Keyingi mavsumda «Shaxtyor» Birinchi ligada to‘rtinchi o‘rinni egalladi va birinchi urinishdayoq yuqori divizionga qayta olmadi.
Qarag‘anda klubi Qozog‘iston chempioni unvonini ikki marta — 2011 va 2012 yillarda qo‘lga kiritgan. 2013 yilda esa «Shaxtyor» mamlakat Kubogi va Superkubogida g‘olib bo‘lgan. Shuningdek, klub chempionatning bronza medallarini uch marta — 1995, 2007 va 2009 yillarda qo‘lga kiritgan.
Klubning xalqaro maydondagi eng katta muvaffaqiyati ham 2013 yilga to‘g‘ri keladi. Chempionlar ligasi saralash bosqichida Viktor Kumukov boshchiligidagi jamoa BATE va Albaniyaning «Skenderbeu» klublarini mag‘lub etdi. Pley-off bosqichida esa o‘z maydonida «Seltik»ni 2:0 hisobida yengdi, ammo Glazgoda o‘tkazilgan javob uchrashuvida 0:3 hisobida mag‘lub bo‘ldi. Shundan so‘ng «Shaxtyor» Yevropa ligasining guruh bosqichida ishtirok etdi va yevrokuboklarning guruh bosqichiga chiqqan ilk Qozog‘iston klubiga aylandi.
Bu galgi muvaffaqiyat klub xususiy mulkka o‘tganidan keyin qo‘lga kiritilgan birinchi sovrin bo‘ldi. 2025 yil noyabr oyida klubni taniqli tadbirkor Timur Turlovga tegishli Freedom Holding Corp. tarkibiga kiruvchi kompaniya sotib olgandi.
