cpc.ru sayti fotosurati
Qora dengizdagi Kaspiy quvurlari konsorsiumining (KQK) muhim eksport portida cho‘zilib ketgan ta’mirlash ishlari tufayli Qozog‘istonda neft qazib olish kamayishi mumkin, deb yozadi Bloomberg.
Hozirda Novorossiysk portidagi KQK terminalidagi uchta langar blokidan faqat bittasi ishlamoqda — biri noyabr oyi oxirida Ukraina dronlari hujumidan jiddiy shikastlangan, ikkinchisi esa o‘sha paytda rejali texnik xizmatdan o‘tayotgan bo‘lgan.
To‘liq eksport hajmini saqlab qolish uchun mamlakatga kamida ikkita ishlaydigan langar bloki kerak. Shu sabab, hisobotda aytilishicha, omborlarda neft zaxiralari to‘plana boshlagan.
Dastlab, dronlardan shikastlanmagan bitta bardoshli langar uskunasida (BLU) texnik xizmat ko‘rsatish ishlari 11 dekabrda yakunlanishi kutilgan edi. Keyinchalik 13 dekabr sanasi aytildi. Biroq, bu masala bilan tanish bo‘lgan Bloomberg manbalari ta’mirlash ishlari 15 dekabrgacha davom etishini aytishgan — bu avval kutilganidan ko‘proq muddat.
Agar vaziyat shunday davom etaversa, omborxonalar to‘lib ketishi mumkin, bu esa Qozog‘istonni ishlab chiqarishni qisqartirishga majbur qiladi, deydi agentlikning o‘z nomini oshkor qilmaslikni so‘ragan manbalari (zero, ular taqdim etgan ma’lumotlar maxfiy hisoblanadi).
Qozog‘iston Energetika vazirligi va KQK hali bu masala bo‘yicha rasman izoh bermagan.
Kaspiy quvurlari konsorsiumi ulushiga Qozog‘iston neft eksportining taxminan 80 foizi to‘g‘ri keladi, jumladan, Chevron, Exxon Mobil va Shell kabi yirik kompaniyalari neft eksporti ham shular jumlasidan. Noyabr oyida KQKning Novorossiyskdagi neft terminaliga bir necha bor hujum qilingan, ularning ichida eng yomoni oy oxirida sodir bo‘lgan. KQK Qozog‘istondagi yirik konlardan neftni eksport qiluvchi eng yirik quvur hisoblanadi, shuningdek undan Rossiya neftining bir qismi tashiladi. Bloomberg ma’lumotlariga ko‘ra, hujumlar natijasida noyabr oyida KQKda yuk tashish hajmi oktyabr oyiga nisbatan kuniga taxminan 155 000 barrelga kamaygan.
Bir kun oldin Reuters Qozog‘iston dekabr oyida Atasu-Alashankou quvuri orqali Xitoyga taxminan 50 000 tonna Kashag‘an neftini yetkazib berishni va bu bilan asosiy eksport yo‘nalishi — Kaspiy quvurilari konsorsiumi (KQK) tizimidagi hajmni boshqa tomonga yo‘naltirishni rejalashtirayotganini xabar qilgan edi.
