Qozog‘istonda Kaspiy dengizidagi mashg‘ulotlar vaqtida 14 nafar harbiy xizmatchining halok bo‘lishi munosabati bilan Mudofaa vazirligining besh nafar mansabdor shaxsi qo‘lga olindi. Qo‘lga olinganlar orasida Qozog‘iston Harbiy-dengiz kuchlari bosh qo‘mondonining birinchi o‘rinbosari ham bor. Bu haqda respublika Ichki ishlar vazirligi matbuot xizmati xabar berdi.
«Og‘ir oqibatlarga olib kelgan xizmatga sovuqqonlik bilan munosabatda bo‘lish va kemani boshqarish qoidalarini buzish bilan bog‘liq jinoiy huquqbuzarliklarni sodir etganlikda gumon qilinib, Qozog‘iston Respublikasi Qurolli Kuchlarining yuqori va katta qo‘mondonlik tarkibidagi mas’ul mansabdor shaxslar qo‘lga olindi. Qo‘lga olinganlar orasida Qozog‘iston Respublikasi Qurolli Kuchlari Harbiy-dengiz kuchlari shtabi boshlig‘i — bosh qo‘mondonning birinchi o‘rinbosari, ikkita harbiy qism komandiri, shuningdek, dengiz piyodalari rotasi va kater komandirlari bor», — deyiladi xabarda.
Gumonlanuvchilar Aqtau shahridagi vaqtinchalik saqlash izolatoriga joylashtirilgan. Qozog‘iston Ichki ishlar vazirligi, shuningdek, tergovchi gumonlanuvchilardan biriga uni xizmat vazifalariga sovuqqonlik bilan munosabatda bo‘lganlikda gumon qilinib qo‘lga olinganini ma’lum qilayotgan videoni e’lon qilgan. Videoda figurantlarning yuzlari yashirilgan, vazirlik xabarida ularning ismlari aniqlashtirilmagan.
Biroq Elmedia nashrining yozishicha, qo‘lga olinganlardan biri Harbiy-dengiz kuchlari qo‘mondonining birinchi o‘rinbosari Daniyar Xayrushev bo‘lib, u joriy yil may oyida prezident To‘qayev tomonidan Bauirjan Momishuli nomidagi II darajali «Aybin» ordeni bilan taqdirlangan.
Shu bilan birga, Ichki ishlar vazirligi tergovchilar «qo‘lga olinishi lozim bo‘lgan shaxslarning qo‘shimcha doirasini aniqlayotganini» ta’kidlaydi.
Tergov versiyasiga ko‘ra, favqulodda hodisa Kaspiy dengizi sohilidagi Aqtau shahridan 43 kilometr uzoqlikda bo‘lib o‘tgan mashg‘ulotlar vaqtida sodir bo‘lgan. U yerda «noqulay meteorologik sharoitda «Qaysar» kateridan shaxsiy tarkibni tushirish vaqtida harbiy xizmatchilar dengizga oqib ketgan». Ayni paytda idora mashg‘ulotlar davomida figurantlar tomonidan qarorlar qabul qilinishi holatlarini, xavfsizlik talablariga rioya etilganini, ob-havo sharoitlari hisobga olinganini va katerning texnik holatini o‘rganmoqda.
Hodisa 24 sentyabr kuni Kaspiy dengizining Qozog‘iston sektorida Harbiy-dengiz kuchlarining «Xazar qorg‘ani-2026» mashg‘ulotlari vaqtida sodir bo‘lgan. Xabar qilinishicha, dengizga 17 kishi oqib ketgan, ulardan uch nafari qutqarib qolingan. Hozirga kelib, halok bo‘lgan 14 kishining barchasining jasadi topilgan. 25 sentyabr kuni Qozog‘istonda Kaspiy dengizida halok bo‘lgan harbiylar xotirasiga umummilliy motam kuni deb e’lon qilindi.
