Aymen Huseyn. «Paxtakor» FK matbuot xizmati fotosurati
Toshkentning «Paxtakor» futbol klubi Iroq milliy terma jamoasi hujumchisi Aymen Huseyn bilan shartnoma imzolaganini e’lon qildi. 30 yoshli futbolchi bilan tuzilgan bitim joriy mavsum yakuniga qadar amal qiladi. Bu haqda klub matbuot xizmati xabar berdi.
Klub transferning moliyaviy shartlarini oshkor qilmadi. Ayrim Iroq nashrlari transfer oldidan Huseyn «1+1» tizimi bo‘yicha shartnoma imzolashi va uning yillik maoshi taxminan 1 million AQSH dollarini tashkil etishi mumkinligini xabar qilgan edi. Biroq bu ma’lumotlar rasman tasdiqlanmagan. «Paxtakor» bayonotida faqat futbolchi bilan mavsum oxirigacha shartnoma tuzilgani aytilgan.
Huseyn 2026 yilgi Jahon chempionatida Iroq terma jamoasining asosiy hujumchisi bo‘lgan. Guruh bosqichining birinchi turida u Norvegiyaga qarshi o‘yinda Amir Al-Ammarining uzatmasidan so‘ng gol urib, hisobni tenglashtirgandi. Biroq yakunda iroqliklar 1:4 hisobida mag‘lub bo‘lishdi, keyin esa Fransiya va Senegalga ham imkoniyatni boy berishdi. Huseynning goli terma jamoaning ushbu turnirdagi yagona to‘pi bo‘lib qoldi va Iroq termasining Jahon chempionatlaridagi tarixidagi ikkinchi goliga aylandi — avvalgisi 1986 yilgi mundialda Ahmad Roziy tomonidan kiritilgan edi.
Hujumchi amalda terma jamoani ushbu turnirga o‘z kuchi bilan olib chiqdi: hal qiluvchi qit’alararo pley-off bahsida Boliviyaga qarshi o‘yinda Huseyn g‘alaba golini urdi va Iroqqa 40 yil ichida ilk bor Jahon chempionatiga chiqish imkonini berdi. Norvegiya darvozasiga urilgan goldan keyin uning milliy jamoa safidagi ko‘rsatkichi 92 ta o‘yinda 33 ta golni tashkil etdi.
Huseyn faoliyatidagi eng yaxshi musobaqalardan biri 2023 yilgi Osiyo Kubogi bo‘ldi. Hujumchi 6 ta gol urdi, jumladan Yaponiya ustidan qozonilgan g‘alabali uchrashuvda ikki marta, Vetnamga qarshi bahsda esa dubl qayd etdi. Iordaniyaga qarshi 1/8 final o‘yinida ham u gol urdi, ammo golni nishonlagani uchun ikkinchi sariq kartochka olib maydondan chetlatildi. Kamchilikda qolgan Iroq qo‘shimcha vaqtda ikki marta gol o‘tkazib yuborgan va musobaqani tark etgan.
Huseynning so‘nggi klubi Iroqning «Al-Karma» jamoasi bo‘ldi. Undan avval hujumchi Qatar, BAA, Marokash va Tunis chempionatlarida to‘p tepgan, o‘z yurtida esa jumladan «Al-Kuva Al-Javiya», «Al-Shorta» va «Al-Naft» klublari sharafini himoya qilgan.
Huseyn «Paxtakor» tarkibidagi uchinchi iroqlik futbolchi hisoblanadi. Toshkent jamoasida hozirga qadar Jahon chempionatida ishtirok etgan yarim himoyachi Bashar Rasan va himoyachi Zaid Tahsin ham o‘ynamoqda.
O‘zbekiston Superligasining 15 turidan so‘ng «Paxtakor» 34 ochko to‘plab, ikkinchi o‘rinni egalladi va Farg‘onaning «Neftchi» jamoasidan ikki ochko ortda qoldi. 11 avgust kuni Toshkent klubi Osiyo Chempionlar ligasi Elit turniri saralash bosqichi doirasida Iordaniyaning «Al-Husayn» jamoasini qabul qiladi.
