Kamchibek Tashiyev. «Region» telekanali videosidan kadr
So‘nggi besh yil ichida keng ko‘lamli korrupsiyaga qarshi kurash kampaniyasi davomida davlatga 300 milliard somdan ortiq (3,4 milliard dollar) aktivlar qaytarildi. Bu haqda Milliy xavfsizlik davlat qo‘mitasi (MXDQ) raisi va Bosh vazir o‘rinbosari Kamchibek Tashiyev «Region» telekanaliga bergan intervyusida ma’lum qildi, deb xabar beradi 24.kg.
Xavfsizlik xodimining so‘zlariga ko‘ra, 1000 dan ortiq ko‘chmas mulk obyektlari va 30 ming gektar yer davlat mulkiga o‘tkazilgan. Ushbu aktivlar ilgari qonunlarni buzgan holda xususiylashtirilgan yoki boshqa maqsadlarda foydalanilgan, deb tushuntirdi Tashiyev.
«Xususiylashtirish paytida qonunlar buzilgan. Obyektlar o‘z vazifasini bajarmagan. Masalan, ular avtobaza yoki zavodlarni egallab olishgan, ammo ular o‘z sohasida ishlamagan, mulklar esa talon-taroj qilingan», — dedi maxsus xizmat rahbari.
Uning ta’kidlashicha, 2020 yilgacha ko‘plab ijtimoiy obyektlar va sanoat korxonalari amaldorlarning shaxsiy boyligi uchun sotilgan va bu vaziyatni o‘zgartirish uchun 2020 yil oxirida hokimiyat tepasiga kelgan prezident Sadir Japarovdan siyosiy iroda talab etilgan.
Bosh vazir o‘rinbosarining so‘zlariga ko‘ra, so‘nggi besh yil ichida davlat idoralarida korrupsiya darajasi 80% dan 30% gacha pasaygan. Milliy xavfsizlik davlat qo‘mitasi (MXDQ) bu ko‘rsatkichni 2026 yil oxiriga kelib 10% ga yetkazishni rejalashtirmoqda.
«Avvaliga ko‘pchilik biz korrupsiyaga qarshi qattiq kurashishimizga ishonmagandi. Ular Tashiyevning pul olmasligi mumkinmas, deb o‘ylashgan. Hattoki pullarni korobkalarga solib kelishgan. Lekin ular javobgarlikka tortildi. So‘nggi yillarda korrupsiyaga qarshi qattiq kurashdan so‘ng, jamiyat maqsadimiz korrupsiyani butunlay yo‘q qilish ekanini angladi», —dedi Tashiyev.
MXDQ raisi shuningdek, xalqaro korrupsiyaga qarshi reytinglar haqida ham gapirdi. Tashiyev ularni siyosiylashtirilgan deb atadi va Qirg‘iziston hozirda jinoyatchilikka qarshi kurash samaradorligi bo‘yicha MDH mamlakatlari orasida yetakchi o‘rinni egallashini aytdi.
Maxsus xizmat rahbari amaldorlardan halol ishlashni yoki davlat xizmatidan ketishni talab qildi. U korrupsiya jinoyatlari uchun javobgarlik hamma uchun muqarrar bo‘lishi va hech qanday qarindosh-urug‘chilik yordam bermasligi haqida ogohlantirdi.
Tashiyevning o‘zining prinsipial pozitsiyasi tufayli do‘stlarining qariyb 70 foizini yo‘qotgani va ba’zi qarindoshlari bilan munosabatlariga putur yetganini ta’kidladi.
«Men hatto qarindoshlarimni ham qamoqqa tashladim. Qudam hozirda 2020 va 2023 yillar oralig‘ida sodir etgan jinoyatlari uchun MXDQ hibsxonasida. Kimlar oldimga kelmadi deysiz — akam, qarindoshlarim — barchasi uni ozod qilishimni so‘rashdi. Lekin men bunday qilmadim. Qudam jazolanishi kerak. Agar biz uni ozod qilganimizda, odamlar menga ishonmay qo‘yishardi», — dedi Tashiyev.
U qarshilik va shaxsiy yo‘qotishlarga qaramay, Qirg‘izistonda korrupsiyaga qarshi kurashni oxiriga yetkazishga va’da berdi.
