AQSH Oq uy yaqinidagi otishmadan so‘ng afg‘on qochqinlarini qabul qilishni noma’lum muddatga to‘xtatdi, otishmada afg‘on fuqarosi asosiy gumondor sifatida ko‘rsatilgan, deb xabar beradi ABC News.
26 noyabr kuni kechqurun AQSH Fuqarolik va Immigratsiya Xizmatlari ((USCIS) «afg‘on fuqarolari bilan bog‘liq barcha immigratsiya so‘rovlarini ko‘rib chiqish xavfsizlik va tekshirish protokollari qayta ko‘rib chiqilgunga qadar noma’lum muddatga to‘xtatilganini» e’lon qildi.
Bu bayonot AQSH prezidenti Donald Trampning 26 noyabr kuni Milliy gvardiya qo‘shinlariga qilingan hujum haqidagi so‘zlaridan ko‘p o‘tmay paydo bo‘ldi. Bir kishi ularga qarata o‘q uzgan va ikki kishini jiddiy jarohatlangan.
Vashington politsiyasi boshlig‘i yordamchisi Jeffri Kerrollning so‘zlariga ko‘ra, voqea soat 14:15 da (Moskva vaqti bilan soat 22:15) sodir bo‘lgan. Gumondor «burchakni aylanib o‘tib, o‘qotar qurol bilan qo‘lini ko‘tarib, Milliy gvardiya qo‘shinlariga qarata o‘q uzgan. «Bir oz ikkilanishdan» so‘ng, boshqa Milliy gvardiya askarlari hujumchini «tinchlantirishga» ulgurishgan. Uni qattiq yaralashgan va hibsga olishgan.
Otishma sodir etgan shaxsning yonidan uning shaxsini tasdiqlovchi hujjat topilmagan, ammo tez orada u 29 yoshli Rahmonulloh Laqanval ekanligi aniqlangan. U 2021 yil sentyabr oyida Kobulda «Tolibon»* hokimiyatni egallab olganidan so‘ng amerikaliklar bilan hamkorlik qilgan afg‘onistonliklarni evakuatsiya qiluvchi «Xush kelibsiz ittifoqchilar» dasturi doirasida AQSHga kelgan. Laqanval 2024 yili boshpana so‘rab murojaat qilgan va 2025 yilda unga boshpana berilgan.
Tramp Milliy gvardiya askarlariga qilingan hujumni «yovuzlik, nafrat va terror harakati» deb atagan va otishma sodir etgan shaxs «juda katta badal to‘lashini» va’da qilgan. U gumondor o‘zidan oldingi prezident Jo Baydenning ma’muriyati davrida Afg‘onistondan – «yer yuzidagi do‘zax makoni»dan kelganini ta’kidladi. Tramp barcha afg‘on qochqinlarini qayta ko‘rib chiqishni buyurdi.
«Endi biz Bayden davrida Afg‘onistondan mamlakatimizga kelgan har bir chet ellikni tekshirishimiz kerak va bu yerga tegishli bo‘lmagan va mamlakatimizga hech qanday naf bermaydigan har qanday chet ellikni mamlakatdan chiqarib yuborish uchun barcha zarur choralarni ko‘rishimiz kerak. Agar ular mamlakatimizni seva olmasalar, biz ularni xohlamaymiz. Amerika hech qachon terror oldida egilmaydi va taslim bo‘lmaydi» — dediTramp.
Markaziy razvedka boshqarmasining (MRB) ma’lumotlariga ko‘ra, Lakanval Afg‘onistonda yashagan payti AQSHning turli hukumat idoralari, jumladan, MRB bilan hamkorlik qilgan.
*Ko‘pgina mamlakatlarda terrorchi sifatida tan olingan va taqiqlangan tashkilot.
