Markaziy Osiyo respublikasida tashkil etilayotgan O‘zbek-Fransuz universiteti Yevropa mamlakatidagi to‘rtta universitet boshqaruvi ostida faoliyat yuritadi. Bu haqda O‘zbekiston prezidenti Shavkat Mirziyoyevning Lex.uz portalida e’lon qilingan tegishli farmonida so‘z yuritiladi.
Ta’kidlanishicha, O‘zbekiston tomonidan Oliy ta’lim, fan va innovatsiyalar vazirligi hamda Fransiya tomonidan Oliy ta’lim, tadqiqot va kosmos vazirligi universitet muassislari hisoblanadi.
Universitetni boshqarish to‘rtta tashkilotdan iborat konsorsiumga ishonib topshirilgan:
✅ Puate universiteti;
✅ Renn universiteti;
✅ Gavr-Normandiya universiteti;
✅ Lyumer Lion 2 universiteti.
Farmonga ko‘ra, konsorsiumga ta’lim jarayonini tashkil etish, o‘quv rejalari, o‘quv dasturlari va materiallarini ishlab chiqish, talabalarni qabul qilish va pedagoglarni saralash jarayonlarida ko‘maklashish majburiyatlari yuklatiladi.
O‘zbek-Fransuz universitetida dastlabki bosqichda magistratura, keyinchalik bosqichma-bosqich bakalavriat va doktoranturada kadrlar tayyorlash yo‘lga qo‘yiladi. Shuningdek, shu universitetga kirish uchun tayyorlov kursi joriy etiladi.
Ta’lim jarayoni maqsadli grant va pullik shartnoma asosida amalga oshirilishi rejalashtirilgan. Bitiruvchilar qo‘shma universitet diplomi va konsorsiumga kiritilgan fransuz universiteti diplomini oladilar.
Qabul jarayoni va kvotalar, shartnoma miqdori va talabalarni baholash jarayoni bo‘yicha qarorlar O‘zbekiston va Fransiya tomonidan teng asosda tuziladigan vasiylik kengashi tomonidan qabul qilinadi.
O‘zbekiston prezidentining farmoni bilan universitetning moliyalashtirish manbalari belgilab berilgan. Bularga umumiy sonning 30% gacha bo‘lgan grantlar bo‘yicha talabalarni o‘qitish uchun davlat budjeti mablag‘lari, shartnomalar bo‘yicha mablag‘lar, universitet ma’muriyatining budjetdan tashqari mablag‘lari, shuningdek, xayriyalar va qonun bilan taqiqlanmagan boshqa manbalar kiradi.
Rektor Markaziy Osiyo respublikasi Ta’lim vazirligi tavsiyasi bilan, o‘quv jarayonini boshqarish va mutaxassislarni tayyorlash sifati uchun mas’ul bo‘lgan prorektor esa yevropalik hamkorlar tomonidan tayinlanadi.
ℹ️ O‘zbek-Fransuz universitetini tashkil etish to‘g‘risidagi hukumatlararo bitim shu yilning mart oyida Shavkat Mirziyoyev va Fransiya prezidenti Emmanuel Makron o‘rtasidagi muzokaralardan so‘ng imzolangan bo‘lib, bu muzokaralar O‘zbekiston rahbarining Parijga davlat tashrifi doirasida bo‘lib o‘tgandi.
