Shavkat Mirziyoyev. O‘zbekiston prezidenti matbuot xizmati fotosurati
O‘zbekiston hukumati qurilish materiallari sanoatida qiymati 2,4 milliard dollar bo‘lgan 112 ta loyihasini amalga oshirishni, shuningdek, qiymati 110 million dollar bo‘lgan beshta yirik, strategik ahamiyatga ega korxonalarni ishga tushirishni rejalashtirmoqda. Bu mamlakatda 13 500 dan ortiq yangi ish o‘rinlarini yaratadi. 20 noyabr kuni prezident Shavkat Mirziyoyev raisligida bo‘lib o‘tgan yig‘ilishda sanoatni rivojlantirish rejalari muhokama qilindi, deb xabar beradi davlat rahbari matbuot xizmati.
Davlat rahbari kelgusi yillarda qurilish materiallari ishlab chiqarishni ko‘paytirish va loyiha portfelini 3,5 milliard dollarga yetkazish maqsadini qo‘ydi. U bunda har bir viloyat va tumanning mavjud resurslari, xomashyo bazasi va logistika imkoniyatlari hisobga olinishi kerakligini ta’kidladi.
Shuningdek, eksportga ham e’tibor qaratish kerak, zero qo‘shni mamlakatlarda 4 milliard dollardan ziyod qurilish materiallari bozori bor. Bundan tashqari, 26 mamlakatga 9 ta mahsulot eksportini keskin ko‘paytirish imkoni mavjud.
Yig‘ilishda muhokama qilinganidek, O‘zbekiston aholisi so‘nggi sakkiz yil ichida 6 million kishiga ko‘paydi. Yangi uy-joylar, yo‘llar va ijtimoiy infratuzilma qurilishi mutanosib ravishda kengaymoqda. Xususan, ushbu davrda 210 million kvadrat metr turar-joy va noturarjoy maydonlari foydalanishga topshirildi, 565 ming kvartirali ko‘p qavatli binolar qurildi, bu avvalgi yillarga nisbatan o‘n baravar ko‘p.
Qurilish materiallarining sanoati uchun ham katta imkoniyatlar yaratildi. Uning hajmi so‘nggi sakkiz yilda 4 barobar o‘sib, joriy yilda 53 trillion so‘mga, eksporti esa 1,1 milliard dollarga yetishi kutilmoqda. Eng muhimi, bu tarmoq Surxondaryo, Sirdaryo, Xorazm va Jizzax viloyatlarining ilgari sanoati bo‘lmagan tumanlarida ish o‘rni va daromad manbai yaratadigan katta «drayver» sohaga aylandi.
Shu bilan birga, sohada mahsulotlar sifati va standartlarga rioya etish, logistika masalalari, yangi bozorlarga chiqish bilan bog‘liq muammolar saqlanib qolayotgani qayd etildi. Jumladan, PVX-quvur, fitinglar, pardozbop tosh va qurilish oynasi ishlab chiqaruvchi yirik korxonalar mavjud bo‘lsa-da, 2024 yilda ushbu mahsulotlar katta hajmda import qilingani ko‘rsatib o‘tildi.
Taqdimotda kaolin zaxiralaridan samarali foydalanish masalalari ham o‘rganildi. Respublikada 1 milliard tonnadan ortiq kaolin bo‘lishiga qaramay, har yili millionlab dollarlik chinni import qilinayotgani qayd etildi. Shu bois, kelgusi yilda kaolinni chuqur qayta ishlash bo‘yicha 515 million dollarlik 40 ta loyihani amalga oshirish va 460 nafar mutaxassis tayyorlash rejalashtirilgan.
Tarmoqda energiya samaradorligi masalalari muhokama qilindi. Rasmiylarning xabar berishicha, 34 ta korxonada o‘tkazilgan auditlar natijasida ishlab chiqarish uchun yoqilg‘i xarajatlari kamaygan. Ushbu ishlarni tizimli ravishda davom ettirish, shu bilan birga energiya tejamkor va ekologik toza qurilish materiallari ulushini kelgusi yilda 25% ga va 2030 yilga kelib 35% ga oshirish maqsad qilindi.
Ilmiy salohiyatdan keng foydalanish ham rejalashtirilgan. Masalan, Toshkent kimyo texnologiyalari institutida Germaniya, Turkiya va Janubiy Koreya mutaxassislari ishtirokida to‘rtta qurilish materiallari loyihasi amalga oshirilmoqda. Kelgusi yilda bunday tashabbuslarni moliyalashtirish uchun 30 milliard so‘m (2,5 million dollar) ajratiladi.
Korxonalarda raqamli boshqaruv va sun’iy intellekt texnologiyalarini keng joriy etish orqali tannarxni 5-10 foizga qisqartirish mumkinligi ta’kidlandi. Bunday tizimlar joriy etiladigan korxonalarni ko‘paytirish maqsadida ikki yil davomida 100 milliard so‘m ajratilishi belgilandi.
Mamlakatning Jahon savdo tashkilotiga a’zo bo‘lishi jarayonida qurilish materiallari sohasi ham xalqaro talablarga moslashtirilmoqda. O‘tgan davrda bu borada 125 ta xalqaro standart qabul qilindi. 2026 yili buni 166 taga yetkazish muhimligi qayd etildi.
