O‘zbekiston va Pokiston yaqinda Karachi va O‘zbekiston shaharlari o‘rtasida yangi to‘g‘ridan to‘g‘ri aviareyslarni yo‘lga qo‘yishga, shuningdek, Pokiston Milliy banki (PMB)ning Toshkentdagi filialini qayta ochishga kelishib oldi, deb xabar beradi The Nation.
«Pokiston yillik ikki tomonlama savdo hajmini 2 milliard dollarga yetkazish maqsadiga erishish uchun sa’y-harakatlarni tezlashtiradi», – dedi Bosh vazirning sanoat va ishlab chiqarish bo‘yicha maxsus yordamchisi Xarun Axtar Xon 17 noyabr kuni bo‘lib o‘tgan sakkizinchi ikki tomonlama hamkorlikni ko‘rib chiqish sessiyasida.
Islomobodda bo‘lib o‘tgan uchrashuvda O‘zbekiston elchisi Alisher Taxtayev, hukumat vakillari, ishbilarmon doiralar va ikki mamlakat diplomatik korpusi ishtirok etdi. Ular farmatsevtika, bank ishi, aviatsiya va tog‘-kon sanoati sohalarida hamkorlik istiqbollarini muhokama qilishdi.
Avia qatnovlari savdo munosabatlarida asosiy masalaga aylandi. Hozirda Toshkentdan Islomobod va Lahorga to‘g‘ridan to‘g‘ri reyslar amalga oshirilmoqda. Alisher Taxtayev biznes va turizm aloqalarini rivojlantirish uchun Karachi va O‘zbekiston shaharlari o‘rtasida to‘g‘ridan to‘g‘ri reyslarni yo‘lga qo‘yishni taklif qildi. Pokiston tomoni tashabbusni qo‘llab-quvvatladi va ushbu yo‘nalishlar savdo va turizm uchun qo‘shimcha imkoniyatlar ochishini va O‘zbekistonni Fors ko‘rfazi mamlakatlari va Yevropa o‘rtasidagi yangi tranzit markaziga aylantirishi mumkinligini ta’kidladi. Pokiston Bosh vaziri Shahboz Sharifning ko‘rsatmasi bilan tegishli idoralarga ushbu yangi reyslarning ishga tushirilishini tezlashtirish va muntazamligini ta’minlash topshirildi.
Moliyaviy sohada PMBning Toshkentdagi vakolatxonasini qayta ochish to‘g‘risida kelishuvga erishildi, bu ishtirokchilarning fikriga ko‘ra, ikki mamlakatdagi kompaniyalar o‘rtasidagi hisob-kitob va tranzaksiya jarayonlarini sezilarli darajada soddalashtiradi. PMBning Toshkentdagi vakolatxonasi 1995 yildan beri faoliyat yuritib kelmoqda va 2020 yil iyul oyida bankning o‘z tashabbusi bilan uning biznes strategiyasi o‘zgargani sababli yopilgandi. Tomonlar bank operatsiyalarining qayta tiklanishi bozorning yaqinroq integratsiyasiga va iqtisodiy aloqalarni rivojlantirishga yordam berishini ta’kidladilar.
Ishtirokchilar, shuningdek, Markaziy va Janubiy Osiyoni integratsiyalashda muhim elementga aylanishi mumkin bo‘lgan Transafg‘on temir yo‘li loyihasini o‘z ichiga olgan quruqlik va temir yo‘l infratuzilmasini rivojlantirish muhimligini ta’kidladilar.
Uchrashuv ishtirokchilari farmatsevtika sanoatini rivojlantirishga alohida e’tibor qaratdilar. O‘zbekiston vakillari Pokistonning ushbu sohadagi ishlab chiqarish salohiyatini yuqori baholadilar va eng yaxshi tajribalar bilan o‘rtoqlashishga, xususan, o‘z yurtida o‘zbek Pharma Park sanoat loyihasini ishga tushirishga qiziqish bildirdilar. Farmatsevtika sanoati vakillari O‘zbekiston bozorida Pokiston dori vositalarini sertifikatlashdagi mavjud muammolarni muhokama qilishdi. Axtar Xon Pokiston Dori vositalarini tartibga solish boshqarmasi (DRAP), Pokiston Farmatsevtika kompaniyalari assotsiatsiyasi va O‘zbekistonning nazorat organlari ishtirokida qo‘shma qo‘mita tashkil etilganini e’lon qildi. Qo‘mita sertifikatlash jarayonlarini tezlashtirish va ma’muriy to‘siqlarni bartaraf etishga e’tibor qaratadi.
Avvalroq, Toshkent va Islomobod yuk tashish, yangi transport yo‘laklarini rivojlantirish va tegishli infratuzilma bo‘yicha strategik hamkorlik shartnomasini imzolagan edi.
