Serdar Berdimuhamedov va Shavkat Mirziyoyev. O‘zbekiston prezidenti matbuot xizmati fotosurati
O‘zbekiston prezidenti Shavkat Mirziyoyev va respublikaga tashrif buyurgan Turkmaniston prezidenti Serdar Berdimuhamedov «Shovot-Toshhovuz» qo‘shma chegaraoldi savdo zonasini ishga tushirish marosimida ishtirok etdilar. Marosim Oliy darajadagi muzokaralardan so‘ng bo‘lib o‘tdi, deb xabar beradi O‘zbekiston rahbari matbuot xizmati.
Mazkur hududda direksiya, bojxona, karantin, fitosanitariya va veterinariya xizmatlarining ma’muriy binolari, savdo paviloni va omborlar joylashgan.
Bu yerda «yagona darcha» tamoyili asosida davlat xizmatlari ko‘rsatiladi, interfaol tizimlar, bank, tibbiyot va mehmonxona xizmatlari uchun zarur infratuzilma tashkil etilgan.
Qayd etilishicha, zona faoliyati umumiy aholisi 3,5 milliondan ziyod bo‘lgan ikkita muhim hudud – O‘zbekistonning Xorazm viloyati va Turkmanistonning Toshhovuz viloyati o‘rtasidagi savdo-iqtisodiy aloqalarni kengaytirishga xizmat qiladi.
Mirziyoyev va Berdimuhamedov o‘rtasidagi muzokaralar davomida loyihani davom ettirish bo‘yicha kelishuvlar muhokama qilindi. Xususan, boshqa bir chegara hududi — «Olot-Farab» hududida qo‘llash bo‘yicha kelishuvga erishildi.
Umuman olganda, tomonlar iqtisodiy munosabatlar rivojlanishidagi ijobiy dinamikani ta’kidladilar. So‘nggi yillarda savdo aylanmasi ikki baravarga oshib, 1 milliard dollardan oshdi. Bundan tashqari, mahsulot turlarini kengaytirish va erkin savdo rejimidan samarali foydalanish orqali bu ko‘rsatkichni 2 milliard dollarga yetkazish uchun barcha imkoniyatlar mavjud.
Sanoat kooperatsiyasini kengaytirish maqsadida qurilish materiallari, farmatsevtika, oziq-ovqat mahsulotlari va boshqa talab yuqori bo‘lgan tovarlar ishlab chiqarishga qaratilgan yangi loyihalarga biznesni faol jalb qilish muhimligi ta’kidlandi.
O‘zbekiston va Turkmaniston energetika sohasida samarali va o‘zaro manfaatli hamkorlikni yo‘lga qo‘ygan. Davlat rahbarlari istiqbolli mineral konlarni birgalikda o‘zlashtirish kabi keng ko‘lamli tashabbuslarni ilgari surishga kelishib oldilar.
Transport masalalariga alohida e’tibor qaratildi. Yuk tashish hajmi o‘sib bormoqda, bojxona-logistika tartiblari soddalashtirilmoqda. Tomonlar Turkmanboshi portini birgalikda rivojlantirish va Toshkent va Ashxobod o‘rtasida o‘rtasida to‘g‘ridan to‘g‘ri aviaqatnovlarni qayta tiklashga kelishib oldilar.
Yetakchilar gumanitar soha ko‘p qirrali aloqalarning mustahkam poydevori ekanligiga urg‘u berdilar. Urganch va Toshkentda Turkmaniston madaniyati kunlari va turkman filmlari namoyishlari muvaffaqiyatli o‘tkazilganini ta’kidladilar. Hamkorlik sur’atini saqlab qolish uchun tomonlar o‘zaro konsertlar va teatrlarning ijodiy safarlarini muntazam ravishda o‘tkazish, Xivada Yoshlar forumini tashkil etish va birgalikda filmlar ishlab chiqarish amaliyotini davom ettirishga kelishib oldilar. Sog‘liqni saqlash va tibbiy texnologiyalar sohasidagi aloqalar ham faollashadi.
Ikki mamlakat prezidentlari joriy yil oxirigacha Hukumatlararo komissiya va Biznes kengashining muntazam yig‘ilishlarini o‘tkazishga kelishib oldilar. Muzokaralar davomida kelishilgan tashabbuslarni amalga oshirish uchun ular qo‘shni davlatlar o‘rtasida har tomonlama hamkorlikni mustahkamlash bo‘yicha qo‘shma harakatlar rejasi bo‘lib xizmat qiladigan «yo‘l xaritasi»ni yaratadilar.
Uchrashuv yakunida Mirziyoyev va Berdimuhamedov Qo‘shma bayonot imzoladilar.
Bundan tashqari, ikki respublika rahbarlari ishtirokida bir qator hujjatlar imzolandi, jumladan:
✔️ O‘zbekiston – Turkmaniston chegaraoldi savdo zonasi faoliyati to‘g‘risidagi shartnoma;
✔️ Sog‘liqni saqlash va tibbiyot fani sohasidagi hamkorlik to‘g‘risidagi bitim;
✔️ Qishloq xo‘jaligi sohasidagi hamkorlikni yanada rivojlantirish to‘g‘risidagi bitim;
✔️ Neft mahsulotlari va suyuq kimyoviy yuklarni tashish uchun temir yo‘l vagonlarini yetkazib berish sohasidagi hamkorlik to‘g‘risidagi memorandum.
