Yuqori darajali tojik delegatsiyasi 15 noyabr kuni toliblar* bilan siyosiy, iqtisodiy va xavfsizlik sohalarida hamkorlikni kengaytirish maqsadida Afg‘onistonga tashrif buyurdi. Bu haqda Afg‘oniston ommaviy axborot vositalari TOLOnews va Amu.tv o‘z manbalariga tayanib xabar berdi. Hozircha bu ma’lumot Tojikiston rasmiylari tomonidan rasman tasdiqlanmagan yoki rad etilmagan.
Afg‘oniston ommaviy axborot vositalarining xabar berishicha, Tashqi ishlar vazirligi, Milliy xavfsizlik davlat qo‘mitasi (MXDQ) va boshqa bir qator idoralar vakillaridan iborat tojik delegatsiyasi toliblar Tashqi ishlar vaziri Amir Xon Muttaqiy bilan uchrashuvlar o‘tkazgan. Muhokamalarning asosiy mavzulari siyosiy masalalar, Kobul va Dushanbe o‘rtasidagi munosabatlar va ikki mamlakat o‘rtasidagi savdo aloqalarini rivojlantirish bo‘lgan. Tojikistonning toliblar hukumatini tan olishni istamasligi sababli uzoq vaqtdan beri yopiq bo‘lib kelgan Dushanbedagi Afg‘oniston elchixonasining faoliyatiga alohida e’tibor qaratilgan.
Ta’kidlanishicha, ushbu tashrif Tojikiston va toliblar hukumati o‘rtasida 2021 yil avgust oyida hokimiyat tepasiga kelganidan beri rasman tasdiqlangan birinchi yuqori darajadagi aloqa hisoblanadi.
Tashrif 2025 yil oktyabr oyida «Tolibon» yetakchisiga yaqin Balx viloyati gubernatori Yusuf Vafo tojik tomonining taklifiga binoan Dushanbega tashrif buyurganida boshlangan bir qator diplomatik aloqalarni davom ettiradi. O‘sha paytda ikki mamlakat vakillari xavfsizlik va razvedka aloqalarini yaxshilash, shuningdek, terrorchi guruhlar va giyohvand moddalar savdosiga qarshi kurashish bo‘yicha qo‘shma sa’y-harakatlarni muhokama qilishgan. Vafoni qabul qilgan Tojikiston Milliy xavfsizlik davlat qo‘mitasi rahbari Saymo‘min Yatimov «Tojikiston va Afg‘oniston qardosh mamlakatlar sifatida tinchlik va do‘stlikda yashaydi» va Dushanbe «biron bir dushman unsur hududimizdan Afg‘onistonga tahdid qilish uchun foydalanishiga» yo‘l qo‘ymasligini aytgan.
10 noyabr kuni Xatlon viloyati raisining o‘rinbosari Zarobiddin Fayzullozoda boshchiligidagi yana bir tojik delegatsiyasi Afg‘onistonga tashrif buyurdi. Qunduz viloyatida tojiklar toliblar vakillari bilan xavfsizlik, razvedka, savdo va konsullik xizmatlari, jumladan, ikki mamlakat ishbilarmonlari uchun vizalar masalalarini muhokama qilishgan.
ℹ️ Tojikiston tarixan Markaziy Osiyo mamlakatlari orasida «Tolibon»ga qarshi eng qattiq pozitsiyani egallab kelgan, bu harakatni tan olishdan bosh tortgan va Afg‘onistonda inklyuziv hukumat tuzish talablarini qo‘llab-quvvatlagan. Dushanbe mintaqada Afg‘oniston elchixonasini toliblarga bermagan yagona mamlakat bo‘lib qolmoqda. Shunga qaramay, Tojikiston Afg‘oniston bilan savdo aloqalarini saqlab qolgan va gumanitar yordam ko‘rsatadi. 2024 yili ikki mamlakat o‘rtasidagi savdo aylanmasi 105 million dollarni tashkil etgan, shundan 70 million dollari Tojikistonning Afg‘onistonga elektr energiyasi eksportiga to‘g‘ri keladi.
*Ko‘pgina mamlakatlarda terrorchi sifatida tan olingan va taqiqlangan tashkilot.
