Marko Rubio. Oq uy sayti fotosurati
AQSH Davlat kotibi Marko Rubio 100 dan ortiq Amerika kompaniyalari rahbarlaridan iborat delegatsiyaga boshchilik qilib, O‘zbekistonga tashrif buyuradi. Tashrif oktyabr oyining o‘rtalarida bo‘lib o‘tadi va Markaziy Osiyo davlatlari hamda AQSH ishtirokida Samarqandda o‘tkaziladigan C5+1 formatidagi vazirlar uchrashuviga bag‘ishlanadi. Bu haqda AQSHning Hindistondagi elchixonasi rasmiy saytida AQSHning Janubiy va Markaziy Osiyo bo‘yicha maxsus vakili Serdjio Gor ma’lum qildi.
C5+1 formati AQSH va Qozog‘iston, Qirg‘iziston, Tojikiston, Turkmaniston hamda O‘zbekistonni birlashtiradi. Muzokaralarning asosiy mavzulari mintaqaviy iqtisodiy o‘zaro bog‘liqlikni chuqurlashtirish, energetika xavfsizligini mustahkamlash va mintaqa uchun umumiy bo‘lgan vazifalarni birgalikda hal etishdan iborat bo‘ladi.
Muzokaralar davomida tomonlar savdo va investitsiyalarni kengaytirish imkoniyatlarini muhokama qilishi kutilmoqda. Muhim minerallar va nodir yer metallari sohasidagi hamkorlik Vashington va Toshkent uchun alohida ahamiyat kasb etadi.
2026 yil fevral oyida O‘zbekiston Tashqi ishlar vaziri Baxtiyor Saidov Vashingtonda Rubio bilan uchrashgan edi. Uchrashuv yakunlari bo‘yicha tomonlar muhim minerallar va nodir yer elementlarini qazib olish hamda qayta ishlash sohasida hamkorlik to‘g‘risida memorandum imzoladi. Toshkent ushbu sohani rivojlantirish uchun Amerika texnologiyalari va investitsiyalarini jalb qilishdan manfaatdor.
Bu yil AQSH va O‘zbekiston o‘rtasidagi iqtisodiy hamkorlik institutsional asosga ham ega bo‘ldi. Aprel oyida Vashingtonda Amerika–O‘zbekiston biznes va investitsiyalar kengashi rasman ishga tushirildi. Kengash 2025 yil noyabr oyidagi C5+1 sammitida prezidentlar Shavkat Mirziyoyev va Donald Tramp erishgan kelishuv asosida tashkil etilgan.
Rubio uchun bo‘lajak tashrif O‘zbekistonga birinchi safari va hozirgi lavozimida Markaziy Osiyoga ilk tashrifi bo‘ladi.
Avvalroq Rubio 2026 yilda Markaziy Osiyoning barcha besh davlatiga tashrif buyurish niyati borligini ma’lum qilgan edi. Hozircha uning O‘zbekistonga tashrifi rasman e’lon qilingan yagona safar hisoblanadi.
