25 sentyabr kuni ertalab O‘zbekistonning Sirdaryo viloyatidagi quvvati qariyb 1600 megavatt bo‘lgan issiqlik elektr stansiyasida avariya yuz berdi. Natijada elektr energiyasi yetkazib berishni ta’minlovchi tizimlar avtomatik ravishda o‘chirildi. Bu haqda respublika Energetika vazirligi matbuot xizmati xabar berdi.
Nosozlik mahalliy vaqt bilan soat 05:05 da Fransiyaning EDF kompaniyasi boshqaruvidagi yangi IESda qayd etilgan. Obyekt faqat avgust oyi oxirida ishga tushirilgani sababli, bu yerda hali sinov va ta’mirlash ishlari davom etmoqda.
Energetika vazirligi ma’lumotiga ko‘ra, favqulodda holat natijasida avariyaviy o‘chirish tizimi ishga tushgan. «O‘zbekistonning ayrim hududlari» elektr energiyasiz qolgan, asosan qishloq xo‘jaligidagi suv nasoslari va maishiy iste’molchilarni elektr bilan ta’minlashda muammolar kuzatilgan.
Vazirlik avariya haqida xabarni e’lon qilgan soat 07:27 ga kelib, elektr ta’minoti allaqachon tiklangani ta’kidlangan. Energetika vazirligi ma’lumotiga ko‘ra, ta’mirlash ishlari olib borilayotgan vaqtda energiyani saqlash tizimlaridagi zaxira quvvatlar ishga tushirilgan. Natijada elektrsiz qolgan iste’molchilar bosqichma-bosqich yana umumiy tarmoqqa ulangan.
Sirdaryo IESdagi hodisa qo‘shni mamlakatlarga ham ta’sir ko‘rsatgan. Jumladan, ertalab Qozog‘istonda ayrim aholi xonadonlarida elektr energiyasi uzilib qolgan. Mahalliy Yagona energetika tizimi operatori bu holat O‘zbekistonda 1,5 ming MVtdan ortiq generatsiya quvvatining o‘chirilishi oqibatida yuzaga kelganini tushuntirdi. Shu sababli Markaziy Osiyo energetika tizimi tomonidan quvvat oqimi yuzaga kelgan va Shimol-Janub tranziti ajralib ketgan. Kompaniyada avariyaga qarshi avtomatika shtat rejimida ishlagani qo‘shimcha qilindi.
Taxminan soat 06:00 da elektr energiyasini uzluksiz yetkazib berish tiklangani haqida ma’lumot paydo bo‘lgan. Shu munosabat bilan iste’molchilarga resurs yetkazib berishdagi cheklovlar bekor qilingan.
Qirg‘izistonda ham elektr ta’minotida uzilishlar kuzatilgan. Xususan, Bishkek shahrining Sverdlov va Pervomay tumanlari aholisidan elektr energiyasi bir necha soatga o‘chirilgani haqida shikoyatlar kelib tushgan. «Milliy elektr tarmoqlari» kompaniyasi ham avariyaga qarshi avtomatika shtat rejimida ishlaganini tasdiqladi. Kompaniya vakillari qo‘shimcha qilishicha, ularning mutaxassislari qo‘shni respublikalardagi hamkasblari bilan birgalikda hodisani tahlil qilmoqda va texnologik buzilish sabablariga aniqlik kiritmoqda.
Sirdaryoda quvvati 1573 MVt bo‘lgan IES ishga tushirilgani haqida joriy yil avgust oyi oxirida xabar berilgan edi. Marosimda O‘zbekiston prezidenti Shavkat Mirziyoyev ishtirok etgandi. Stansiya 900 million dollar miqdoridagi to‘g‘ridan to‘g‘ri investitsiyalar hisobidan qurilgan. U yiliga 13 milliard kilovatt-soat elektr energiyasi ishlab chiqaradi.
Loyiha Fransiyaning EDF, Qatarning Nebras Power, Yaponiyaning Sojitz Corporation va Kyuden International kompaniyalaridan iborat konsorsium tomonidan amalga oshirilgan.
