freepik.com sayti fotosurati
Qozog‘istonda naqd dollarlar tanqisligi yuzaga keldi: bir nechta yirik banklar valyuta berilishini vaqtincha chekladilar, ba’zi valyuta ayirboshlash shoxobchalari esa savdoni butunlay to‘xtatdilar, deb xabar beradi Finratings.kz.
Bu milliy valyutaning sezilarli darajada mustahkamlanishi fonida sodir bo‘lmoqda: 4 dekabr kuni savdo yopilishida dollar kursi olti oy ichida birinchi marta 500 tengedan pastga tushdi.
Iqtisodchi Eldar Shamsutdinovning tushuntirishicha, Amerika valyutasining tanqisligi «kurs o‘zgarishi fonida» dollarga talabning keskin oshishi bilan bog‘liq. Shu bilan birga, valyuta ayirboshlash shoxobchalari yanada qulayroq kurslarga umid qilib, dollarni ushlab turishni afzal ko‘rishmoqda. «Ko‘pgina ayirboshlash shoxobchalari ikki hafta oldin 520 tengedan sotib olishgan va undan pastroqqa sotishni istamayapti», — deydi u.
Qozog‘iston Milliy banki o‘z navbatida tengening mustahkamlanishini tashqi va ichki omillar kombinatsiyasi bilan bog‘laydi. Regulyator neft narxining barrel uchun 60 dollardan yuqori bo‘lishi va global dollar indeksining pasayishiga ishora qiladi. Tenge bir oy ichida 9% ga mustahkamlangan.
Tengrinews.kz ma’lumotlariga ko‘ra, bozor ishtirokchilari bir dollar uchun 500 tenge belgisini asosiy mezon deb bilishadi. Shu bilan birga, nashr tomonidan suhbatlashgan mutaxassislar milliy valyutaning hozirgi mustahkamlanishi vaqtinchalik deb hisoblashadi. «500 tenge belgisi muhim ahamiyatga ega va shu yerdan o‘zgarishlar boshlanishi mumkin. Valyuta kursi bir dollar uchun 500-530 tenge oralig‘ida mustahkamlanishi ehtimoli bor», — deb prognoz qiladi iqtisodchi Marat Kairlenov. Shuningdek, u Qozog‘istonning kelgusi yil uchun budjet loyihasida bir dollar uchun 540 tenge stavkasi ko‘zda tutilganini ta’kidlaydi.
